Fransııa elshiligi men onyń seriktesteriniń uıymdastyrýmen ótetin mádenı sharalar halyqty ónertabysqa, kásipkerlikke baýlýǵa baǵyttalǵan. Bıylǵy shara texnologııalyq ári ınnovasııalyq taqyrypqa arnalýyna baılanysty Astana men Almaty ótetin barlyq mádenı sharalar ozyq texnologııalardyń negizinde uıymdastyrylady. Fılıpp Martınenyń aıtýynsha, «Sıfrlyq kúzdi» ótkizý kezinde Qazaqstannyń sıfrlyq texnologııalarǵa qatysty qazirgi ustanymy barynsha eskeriledi. Osyǵan baılanysty shetel ártisteri ınnovasııalyq ádis-tásilderdi jan-jaqty qoldanady. Al mádenı sharalardyń basym bóligi vırtýaldy túrde kórsetilip, qatysýshylar ınteraktıvti konsert tyńdaýǵa múmkindik alady.
Sondaı-aq elshiniń aıtýynsha, Fransııa elinde de «Sıfrlyq Fransııa» degen baǵdarlama júzege asýda. «Baǵdarlama aıasynda elimizde 2022 jylǵa deıin barlyq ákimshilik sharalardy elektrondy formatqa aýystyrý kózdelgen. Maýsym barysynda osy saladaǵy tájirıbemen bólisip, sondaı-aq ónerkásip, bilim men mádenıetti de qamtýǵa tyrysamyz. 25 qazan kúni Astanada ótetin ónerkásipti sıfrlandyrýǵa arnalǵan forýmǵa fransýz kásiporyndarynyń ókilderi jáne bilikti sarapshylar keledi. Sol kezde jańa jobalar qolǵa alynady dep úmittenemiz. Ekinshi baǵyt - bilim. Fransııada sıfrlyq bilim jaqsy damyǵan. Máselen bizde anımasııalyq fılmderge úıretetin 75 mektep bar. Al úshinshi baǵyt mádenıet salasy boıynsha biraz sharalar vırtýaldy túrde kórsetiledi», deıdi F.Martıne.
«Sıfrlyq kúz - 2018» maýsymy aıasynda sıfrlyq damý taqyrybynda barlyǵy on shaqty mádenı shara ótkizý josparlanyp otyr. Baǵdarlama aıasynda fransýz ártisteri Qazaqstan stýdentteri men ártisterimen shyǵarmashylyq sheberlik synyptar ótkizip, mamandyrylǵan oqý ordalarynda kezdesýler uıymdastyrady.
Mádına JÁLELQYZY,
«Egemen Qazaqstan»
